19
август
2022
«Дала сазы» ансамблінің домбырашылары концерттік бағдарлама ұсынды
Ағымдағы жылғы тамыз айының 19-ы күні № 3 Оқушылар үйінің «Дала сазы» ансамблінің жетекшісі Жарылкапова Алмаш Ордабекқызы өз шәкірттерімен концерттік бағдарлама ұсынды. «Дала сазы» домбырашылар ансамблі Германия, Испания, Астана, Алматы қалаларында өткен Халықаралық конкурстардың бірнеше дүркін лауреаты атанған. Әлбетте, бұл жыл сайын дарынды балалармен жұмыс жасайтын ансамбль жетекшісінің еңбегінің жемісі. Бүгінгі талантты домбырашылар ұйымдастырған концертте де барлық үйірме мүшелері өз өнерлерін ортаға салды. Концерттік бағдарламаны ата-аналар, ұстаздар мен оқушылар тамашалады.
Шара барысында дарынды домбырашылар Құрманғазының «Балбырауын», «Ерке сылқым» күйлерін, Қаршыға Ахмедьяровтың «Қосбасар», Сүгір Әлиевтің «Ыңғай-төк» күйін күмбірлете орындаса, Малғаждар Әубәкіровтың «Талас» күйін жеке орындауда Жақсымбет Дінмұхамед ұсынды. 
Сондай-ақ, Халық әні «Ақеркені» Әділханов Асқар нақышына келтіре шырқады. Мәлік Жамбылұлының «Аягөз қайда барасың» әнін Бауыржанұлы Бейбіт сырнай аспабында ойнап берді. «Дала сазы» домбырашылар ансамблінің концерт бағдарламасы мазмұнды әрі қызықты болды. Музыкалық іс-шара кешке келген көрермендерге ғана емес, оған қатысқан балаларға да жақсы әсер сыйлады.