«Ұлттық ойындар қобдишасы – 2022» атты іс-шара өткізілді
«Балалар жылы» аясында бүгін №3 Оқушылар үйі, Бостандық ауданындағы №40, №88, №145 мектептері және № 29 Орталықтандырылған кітапхана қызметкерлерінің бірлесе ұйымдастыруымен «Ұлттық ойындар қобдишасы – 2022» атты іс-шарасы өткізілді. Аудандық іс-шараға қырыққа жуық жас жеткіншек қатысты. 
Кітапхана алдына жиналған ата-аналар жетіген аспабының үнін «Бозторғай» халықаралық байқаудың бас жүлде иегері №145 жалпы білім беретін мектептің 7 «Б» сынып оқушысы Батырхан Інжудің орындауында ұйып тыңдады.
Ұлттық құндылықтарды дәріптейтін іс-шарада алғашқы сөз алған Бостандық ауданы Білім бөлімі басшысының міндетін атқарушы Қасымбек Айгүл Жұмабекқызы ұлттық ойынның тәрбиелік мәнін айта отырып, жас жеткіншектерге өзінің жылы лебізін білдірді. Сөз тізгінін жалғаған №81мектеп-гимназия директорының тәрбие жұмысының орынбасары Жансая Сәдуақасқызы Жоламанова балаларға сәттілік тіледі.
Келесі кезекте №3 Оқушылар үйінің Несібелді Әлпеннің жетекшілігімен Қалалық байқаулардың жеңімпаздары «Домбыра үні» ансамблінің домбырашылары Жасарал Еңсеповтың «Әке толғауы» күйін күмбірлете ойнады.
Көрерменге көтеріңкі көңіл кдомсыйлаған №3 Оқушылар үйінің Меруерт Алимбетова бастаған «Күн әлемі» халық би ансамблінің қыздары билеген «Қуыршақтар» биі болды.
Ары қарай салтанатты шара кітапхана ішінде «Тоғызқұмалақ» ойынымен жалғасты. Ал кітапхана алаңында балалар «Арқан тарту» мен «Асық ату» ойындарын қызыға ойнады.
Ұлттық-рухани құндылықтарды оқушылардың бойына сіңіруді мақсат тұтқан іс-шарада аудан мектептерінің оқушылары уақыттарын көңілді әрі қызықты өткізді. Іс шараның соңында барлығына балмұздақ таратылды.
