Домбырашылар арасында «күй тартыс» ұйымдастырылды
Бүгін №3 Оқушылар үйінде күйшілік өнерді жаңғыртып жалғастыру мақсатында Несібелді Әлпеннің жетекшілігімен «Домбыра үні» үйірмесінің домбырашылары арасында «Күй тартыс» ұйымдастырылды. Бұл рухани-мәдени шараға онға жуық домбырашы қатысты.
![](/uploads/posts/2022-07//1658402118_img-20220721-wa0012.jpg)
Күй тартыс ережесі бойынша, жетекшілері күйшілерді жеке-жеке тыңдап алды. Үйірме жетекшісі жас домбырашылардың орындау шеберлігі, екі қолдың қойылымы, орындаушының сахна бейнесіне қарап бағалайтынын айтты.
![](/uploads/posts/2022-07//1658402189_p1070672.jpg)
Жас домбырашылар ашық аспан астындағы күй тартысты Жасарал Еңсеповтың «Әке толғауы» күйімен бастап, Дәулеткерейдің «Көроғлы» күйімен жалғады. Соңынан барлығы бір мезетте «Ақсақ киік» күйін күмбірлете орындап берді.
№3 Оқушылар үйінің домбырашылары далада күй ойнау арқылы жеткіншектердің домбыраға деген қызығушылықтарын еселей түсті.
Кішкентайларынан қолдарына домбыра ұстап, ұлттық өнердің ұмытылмауы үшін күй үйреніп жүрген ұл-қыздарға сәттілік тілейміз.