Шеберлік сағаты монотипия әдісімен ұйымдастырылды

Бүгін «Балалар жылы» аясында №3 Оқушылар үйінің жас суретшілері арасында «Таң-Шолпан» бейнелеу өнері студиясының жетекшісі Сәрсебаева Айжан Маратқызының ұйымдастыруымен «Жайдары жаз» тақырыбында монотипия әдісімен шеберлік сағаты өтті. Шығармашылық қабілеттерін дамытуға арналған шеберлік сағатына 20-дан астам бала қатысты.

Айжан Маратқызы сабақты жұмбақ жасыру арқылы бастап, балаларға өздерінің қиялындағы көбелектерді бояу керектігін тапсырды. Сабақ барысында балалар бояу, нүктелік кескіндер, басып шығару, бүрку әдісімен үлкен қызығушылықпен сурет салды.

Сондай-ақ, жетекшілерінің түстерді ажыратуға байланысты ұйымдастырған ойынында белсенділік танытты. Шеберлік сағатында балалар өздерінің даралығын байқатып, салған суреттерін жетекшілеріне көрсетіп, мәз болды.

Қарындашпен немесе бояумен қағазға сурет салу баланың мектептегі оқу процесіне дайындалуға көмектеседі. Дұрыс ұйымдастырылған сурет сабағы баланың интеллектуалдық қабілетін дамытады.